Mga Tula ng Pag-ibig ni Ariel N. Valerio 2008

Banig ng Pangamba

2010-09-03T17:55:00.000+08:00

Banig ng Pangamba

Tukso kang lumatag
sa banig ng aking pangamba,
hinagod ng sariwang hininga
ang mga tulirong luhang
kimkim lagi sa ligamgam ng pag-asa
pero sa gabing ito, pakiusap ko,
ipatong ang iyong palad sa aking puso –
hindi magkakanlong ang init ng aking dugo

1994
(Salamat sa retrieval ni Murphy Red)

Pagpaslang sa mga Pangarap

2010-09-03T13:48:00.002+08:00

Sa siyudad,
isa-isa silang humahapay
parang puno ng saging
na tinitiba pagkatapos kumain
ng sebong pinagyelo muna bago madaliang lutuin
at ikinulong sa mga istayropor na de-kolor
at tagusang plastik na tinatakan ng kamatayan.

Sa mga bukid, burol, at bundok
nagbabara ang lalamunan ng mga ilog at batis
sa pinagbalatan ng shampu, nudels, kendi, yosi,
sirang tsinelas na goma
hanggang maging nag-usling mga ngipin
ng isang higanteng halimaw
na lumalamon sa kinabukasan.

Tao ang nagtutundos ng mga pangako sa bukas,
tao rin ang pumapaslang sa kanyang mga pangarap.

(Unang Rebisyon)

My photo files are gone

2009-07-21T00:16:00.000+08:00

Sa bawat paglilipat ng bahay,
isa o dalawang set ang nawala.
Narito na lamang sila sa gunita.
Mailalarawan na lamang sa mga salita.
Minsan, wala nang salitang makapaglalarawan.
Maliban sa isang buntong-hininga.
O pisil sa palad ng dating kakilala.

Susan

2009-07-05T10:37:00.002+08:00

Naaalala kita
sa entablado ng pakikibaka
hinihimig bawat himaymay
ng dusa o tagumpay;
kilik ang gitara
pinapaawit ng mga kuwerdas
kasabay ng tinig na humahaplos
sa ka luluwa -- sa kaluluwa
ng mga kababayang nagmimithi
ng ngiti sa umaga
ng samyo ng sanghaya
ng paghalik sa mga bulaklak
ng pag-asa
sa gitna ng dilim at dahas
na nakapako sa bawat balikat.
Sa huli,
kumalat sa sariling sistema
ang kanser na inaalis sa lipunan
ngunit matatag mong hinarap
tulad ng pagharang
sa mga baril at bala
sa lansangan ng buhay.
Awit kang aalingawngaw
sa lahat ng nagmamahal
sa kalayaan.

Hinog sa Puno

2008-08-13T00:34:00.002+08:00

Kay Jackie, Pagkaraan ng Dalawang Dekada

!
!
!
!
!
!
!
!
!
!
!
!
!
!
!
!
!
!
!
!
Kumusta naman siya?

Apatnapung Mundo

2008-07-14T06:27:00.002+08:00

Apatnapung mukha sa facebook
ang nagparingas sa mithing yapusin
gaano man kahapdi, gaano man kalalim
ang mga sugat ng ginahasang nakaraan
sa apatnapung mundo
ng tangis at tuwa.

Paglulunoy sa Lumang-lumang mga Larawan

2008-07-14T04:32:00.002+08:00

Sa mga kaibigan sa UP Tropang Bodabil

Minsan lang naganap
sa atin ang lahat
ni hindi dumaplis sa hinagap
na manganganak
ng luha
ang muling pagsilip
sa mga singit
ng nakaraan.

Sa Pagpanaw ng Tag-araw

2008-06-04T23:02:00.002+08:00

Pumanaw na ang tag-araw
ngunit maalinsangan pa rin
sa mga lansangan ng gunam:

Bakit may taong mayayabang
kahit walang ipagyayabang?
Maliban sa balakubak at tinga

kapag humahapon ang pangungulila
sa totoo nilang balikat.
Kahabag-habag ngunit walang magagawa

kundi impitin ang palatak
at asahang hawanin ng himala
ang kanilang abang bukas.

Akyat Baba

2008-04-13T03:02:00.005+08:00

Akyat

Habang nagpapaalam ang kanang kamay
nangungumusta naman ang kaliwa
hahabol ang kanan, susunod ang kaliwa
tinatalunton ng pagod ang lubid
na nakabitin sa tuktok ng bundok.

Baba

Pagsapit sa rurok
humihingal at pawisan
walang ibang pagpipilian
kundi dumausdos muli pababa
o manatiling habambuhay tiwalag
sa paglalakbay ng isang balahibo mula sa alapaap
alinsunod sa batas ng akselerasyon: a=f/m=dv/dt.

Singsing na Apoy

2008-03-29T10:29:00.005+08:00

The Philippines sits on the Pacific Ring of Fire

where continental plates constantly collide.

Dapyo ng amihan

sa talisik na tag-init

ang nagkukubli sa mga lihim

ng higanteng singsing na apoy

kumukubkob sa mga isla

ng mga pangarap at pag-asa

ng isang bayang nakaluklok sa paraiso

ngunit laging liniliglig ng delubyo.

Mas Masaya Bang Manlinlang?

2008-03-11T02:08:00.002+08:00

"Ipinaglaban kita," sabi mo
nang may taginting ng kabayanihan.
"Salamat," tugon ko
kahit wala naman akong kinakalaban.

Kahapon, isang kalatas
ang pumasok sa aking inbox
nagtataka ang isang kaibigan
kung bakit ko tinanggihan
ang taos-puso niyang pabuya.

"Para raw iyon sa kanya,"
paliwanag ko habang naliliwanagan
na ang ipinaglaban mo para sa akin
ay ang pagkaalipin habang iyong inaangkin
ang tunay na para sa akin.

Tubig sa Tubig

2008-03-09T15:14:00.004+08:00

Ngipin sa ngipin

Mata sa mata

-- Banal na Bibliya

Dagat sa balakang
ang nagluwal sa aking hininga
matapos ang siyam na buwan
ng paglulunoy sa sinapupunan.

Sa dagat ako babalik
pagkapugto ng hangin sa dibdib
upang hagkan ang daigdig.

Mula sa isang puwing na alabok
sa alabok din uuwi.

Nais kong baunin
hindi ang hapis
kundi ang ngiti.

Dagat ang sinapupunan
ng aking ina,
babalik ako sa dagat
ng inang kalikasan.

Kaya sunugin ang aking bangkay
at ihasik sa dagat hanggang
kaliit-liitang alabok
upang mabuo ang ikot
ng buhay.

Kahit Nariyan Ka Pa Rin

2008-02-26T01:50:00.003+08:00

The Arroyo administration has had a long history of dishonesty, deceit and lying. Its leaders are caught in a tangled web of deception. They have lost all moral authority to govern the nation.

Philippine Daily Inquirer, Editorial, 26 February 2008

Pero bakit nariyan ka pa rin?
Iwinawasiwas ang mga ahas sa ulo
isinisibat ang tingin sa mga kritiko
habang hinihimod ng salasalang dila
ang puwit ng pangamba sa mga alagad,
na nangulimbat sa kaban ng bayang
nagdidildil ngayon ng asin pantawid
sa mahabang taggutom na parating
habang nagpapakasasa kayo sa mga piging.

Pero kahit nariyan ka pa rin
tiyak na may pupugot sa iyong leeg
matapos sakluban ng sako ang ulo
upang tapusin ang yugto ng pamumuno
mula sa bangis at kamandag
ng panlilinlang.

Himaymay

2008-02-25T10:02:00.004+08:00

and so it is
just like you said it should be
we'll both forget the breeze
most of the time

Damien Rice
The Blower's Daughter

Naninigid ang samyo ng pino
sa bawat butas ng aking balat
at ninanasa ng hapong balikat
ang batubalani ng iyong palad
na hihigop sa lahat ng sakit
magpupunla ng ngiti.

Akala ko'y kayang burahin
ang mga himaymay ng gunita
tulad ng pagpalas ng araw
sa halumigmig ng gabi.

Gayon ba kadaling limutin
lahat ng iyong pangako?

Baligtaran

2008-02-22T03:40:00.000+08:00

666
Sa liblib
na liglig
ng ligalig
sumuksok
ang panibugho
at sumiksik
sa singit
ng pangamba:
Nasaan ka
ngayong gabing
nakatundos
ang tandang
pananong
sa hangin?
Ibinubulong
ng dilim
ang iyong ngalan
sa kanyang
piling.

999
Alimpungatan akong sumiksik
sa pagitan ng ulo mo’t balikat
ngunit walang nahagip ang aking ilong
kundi mga labi ng maghapon
noon sa upahang silid
na limot ng panahon
ngunit nasa dibdib ko
ang sutla mong palad --
salamat, salamat
sa lahat.

Aling Pag-ibig pa ang Hihigit Kaya

2008-02-16T01:37:00.002+08:00

Pasintabi kina Andres Bonifacio at Francisco Baltazar

Aling pag-ibig pa ang hihihigit kaya
sa pagkagahaman at pagkatimawa
gaya ng pag-ibig sa kaban ng bayan
hahamakin lahat masimot ka lamang?

LRT Railway, paliparan ng NAIA
oberpraysan lahat habang nakatunganga
ang masang magbabayad sa lahat ng utang
NBN-ZTE krona ng mga suwapang

Aling pag-ibig pa ang hihigit kaya
naupo sa trono halalan dinaya
bawal ang umangal, titimbuwang bubusalan
dakilang pag-ibig sa kaban ng bayan.

Aleluya! di na kailangan ng batas militar

2008-02-06T23:47:00.000+08:00

Aleluya, aleluya, aleluya!
Halikan ang singsing ng Santo Papa
habang pinapaslang ang mga walang sala
at idinadambana ang mga magnanakaw.

Aleluya, aleluya, aleluya!
Di na kailangan ng batas militar
dahil di naman naglaho mula't mula pa
ang punla ng bangis
ng mga manggagahis:
mula barikadang bakal sa mga kalsada
hanggang rosas na ihian sa mga bangketa
wala tayong ipinagkaiba
sa Nazi concentration camp
kapkap kana, kaliwa, kanan
dinudunggol ang suso ng mga dalaga
dinadakma ang bayag ng mga binata.
Ano pang larawan ang mas marahas
kaysa bagong pintang mga rehas
sa sarili mong tahanan?

Aleluya, aleluya, aleluya!
Kailan lilipas ang bisa
ng gayumang tatak EDSA?

E Ano Ngayon, Tongresman?

2008-02-06T23:42:00.000+08:00

????????
//////////
>>>>>>>>>
<<<<<<<<<<
&&&&&&&&&&
%%%%%%%%%%%%%%%%%%%%%%%%%%%%
%%%%%%%%%%%%%%%%%%%%%%%%%%%%%%%
%%%%%%%%%%%%%%%%%%%%%%%%%%%%%%%%%%%%

hahaha

zzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzz

May Karapatan Tayo sa Sariling Impiyerno

2008-02-06T23:07:00.000+08:00

Paumanhin sa mga pinagpipitaganang
mohon ng panulaan at kilusang mapagpalaya.

Kung laging susundin ang payo ng mga paham
na nabuhay sa kanilang sariling panahon

kung gagagarin lamang maging ang kanilang paraan
ng paghabi ng salita at pagsusukat at tugma,

kung lagi lamang susundan ang bakas
ng nangaunang manlalakbay

disinsana'y walang nakarating sa buwan
o walang satellite na umiikot sa mga planeta

o walang kompyuter o walang cellphone
na nag-uugnay sa mga tao ng bawat bansa

di kaya natin pinagkakaitan ang mga sarili
ng pagkakataong dumanas sa personal na impiyernong

walang ibang makakaunawa kundi mismong indibidwal
na naglalakbay nang lampas sa mga takdang pamantayan

at naranasan kung ano ang kahulugan
ng tunay na paglikha at tunay na kalayaan?

Umiikot ang Roleta

2008-02-06T00:39:00.000+08:00

Taya, taya, taya
sa bangkang mandaraya!

--- Isang kasabihan

Pagkatapos ng piging
sa bahay ng prinsipe,
nagsimulang umikot ang roleta
sa bulwagan ng mga lehislador:

"Sibakin sa puwesto si Juan de Bola!"
utos ng haring bagong opera.
"Di puwedeng mas malaki
ang hati niya sa bibingka!"

Samantala, biglang naglaho sa paliparan
ang kinatawan ng barangay na may kagagawan
sa pagkakabuking ng transaksiyon sa China
bago pa man nakapagturo ng iba pang kasabwat.

Pagdaka'y sumungaw sa pinagtaguang lungga
ang ulo ng bubuwit na nagsabit
sa tagapalit ng mga boto ng reyna
at nagbingit sa kanya sa pagkapiit.

"Jackpot!" sigaw ng kalahok na nagpaikot
ng roleta sa kontes ni Chris sa telebisyon.
"Jakpat!" sabay na sigaw ng reyna at hari
na siguradong-siguradong wala nang impits-impits.

Kanino kayang roleta ang susunod na paiikutin
upang walang umangal sa mga kurakot ng bayan?

Birtuwal na Birtud

2008-02-05T12:53:00.000+08:00

Magkaiba tayo ng realidad.
Sigurado.
Naaaliw ako sa mga konsert mong
Nakabalandra sa youtube
Maging sa mga pelikula mong
Pornograpiko
Sa iyong website.
Naramdaman ko na minsang lumagos
Mula sa monitor ng PC ko
Ang iyong dilang humagod
Sa akin mula ulo hanggang paa
Ngunit pagdilat ko'y wala
Ka na muling kabuhay-buhay.
Mas mabuti pang
Mag-YM na lang tayo
Upang makilala ko
Sa mga salita
Ang tunay mong
Pagkatao.

Sa Muling Pagsisindi ng mga Upos

2008-02-04T00:38:00.000+08:00

Parang pag-ahon sa pagkalunod
ang pagsisindi muli ng upos:
tiyak lalasa ang mga dekada
ng kawalang-kibo
sa bawat hitit-buga
na unti-unting nagtatanim
ng kanser sa dilang
pinipi ng pananahimik
tungkol sa mga di-nais marinig
at mga di-nabigkas ngunit nais marinig,
tungkol sa mga nabigkas
ngunit minasdan lamang lumutang
sa alapaap ng hinagap
na naging usok ngayon ng upos
na kay hirap muling sindihan
gaano man kaalab ang apoy
ng panlabas na pakikiramay.

Luwal ng Internet

2008-01-20T01:22:00.000+08:00

Kasimbilis ng connection speed
ang pagbagsak ng mga salitang
pag-ibig, pagmamahal
sa bawat kable ng internet
pero pagkatapos ng aybol o SEB
hinuhubad ang mga anyo
at idinadakdak sa basurahan
ng banyo sa motel
upang magbanyuhay
sa bagong imbentong pangalan.
Kailangan kasing makarami.
Presyong pakyawan
sa palengke ng laman.

Matapos Akong Mamatay

2008-01-16T02:05:00.000+08:00

Lumilipas lahat:
Ang mga taong umaba sa akin,
Ang mga taong naaba sa akin;
Ang mga pag-ibig na ngumiti at lumisan,
Ang mga pagmamahal na humanggan;
Silang dinakila ngunit di nakilala,
Silang di nakilala ngunit dinakila.
Lahat-lahat ay lumilipas
Tulad ng mga orkidyas
Na napigtal din sa mga tangkay
Ngayong madaling-araw
Dito sa hardin habang naghuhukay
Ako ng lupang tatamnan
Ng mga punong mabubuhay
Matapos akong mamatay.

Rebelyon sa Pabilyon

2007-12-22T22:11:00.000+08:00

"Dapat palitan ang korap na gobyernong ito!"

-- Isang Sundalong Pilipino

Saan nga ba mapupunta
ang protesta ng mga aktibista
kung idaraos sa persklas na pabilyon
at ibobrodkas sa midya?

Wala ni anino ng kritikal na masang
dalawang beses sumakop sa EDSA.

Nasaan ang mga rosaryo't bulaklak,
ang mga ngiti, dasal at palakpak?

Nasaan ang taimtim na pag-ibig?

Umasik ang takipsilim
sa isahang-panig na putukang
umalingawngaw sa hotel.
Parang baboy na itinali
ang midyamen at obispo
matapos magsiwalat ng hinaing
laban sa tusong gobyerno.

Pagkalabas sa piitan
ng mga nagsipaghimutok
balik sa dating gawi
ang ikot ng mundo.

Kaysaklap!

Korap man ang gobyernong ito, sundalo,
tiyak namang di maiguguho
ng isang rebelyon lang sa pabilyon.

Sa Muling Panonood ng Forrest Gump

2007-12-16T04:05:00.000+08:00

Masinop, madulas, makinis:
sadyang ganyan ang pelikula
sa pananaw ng isang bayaning mangmang.

Samantala, narito tayong nanonood:
kinakatas ang tubig-alat sa mga mata
binato-balani ng mahika ng makina.

Sorry it didn't work out

2007-11-08T15:31:00.000+08:00

Hi. This is the qmail-send program at yahoo.com.I'm afraid I wasn't able to deliver your message to the following addresses.This is a permanent error; I've given up. Sorry it didn't work out.

-- Yahoo Autobot

Ikinalulungkot kong hindi nagtagpo
ang mga alon sa ating mga puso.

Kung Tulad Lang Sana ng Hard Disk

2007-10-29T19:48:00.000+08:00

Memorya:
mga bahagi ng buhay
na ikiniskis sa malinis na hard disk
hanggang magdikit-dikit ang files
at idefrag, bawasan, ireformat.

Kung ganito lang sana kadali
magbura ng mga gunita
hindi ko na ipaghahampasan pa
sa apat na sulok ng silid
ang sariling ulong punong-puno
ng iyong tinig ng tinapos na pag-ibig.

Kung tulad lang sana ng hard disk
ang aking dibdib, kaya ko nang magmahal
sanlibo mong ulit matapos maalis
ang nakazip mong mga halik upang malimutan
ang lahat ng sakit.

Karnabal ng mga Karibal

2007-10-27T10:46:00.000+08:00

Buhol-buhol ang mga relasyon
parang butil ng sampung rosaryong
nabalibid sa leeg ng rebulto
hanggang di na makita ang puno't dulo
ng bawat abaginoongmaria at misteryo:
dating kalaguyo ni Jose si Almira
pero kinakasama ngayon ni Jose si Pepe
at dating kasintahan ni Pepe si Almira
habang dumadalaw-dalaw siya kay Perla
samantalang dating kagustuhan ni Perla
si Jose na kalaguyo dati ni Almira.
Kung nahihilo ka sa hilera
ng mga pangala't katawagan
tumawa na lang nang tumawa
sa piling ng sariling mahal.

Hindi na natutulog ang mga gabi

2007-10-20T09:45:00.000+08:00

Hindi na natutulog
ang mga gabi.

Dito sa baybay,
walang humpay ang hampas
ng mga alon sa batuhan.

Ayaw pumikit ng mga bituin
at mulagat lagi ang buwan
habang minamasdan ang marahang
paglubog ng iyong larawan.

Nakabibingi ang koro ng mga kuliglig
na sumasalit-salit sa pagaspas ng hangin
at lagaslas ng mga bula sa aking talampakang
nakalawlaw sa gilid ng isang bangka
habang naghahalikan ang tubig at buwan
sa malayong panginoring kinaiingitan
ng mga mata kong kukurap-kurap na lang
sa paghihintay lunukin ng dagat
ang iyong larawan.
Sa katahimikan, biglang lulutang
ang tinig mong tumatawag
sa aking pangalan, humahagikgik
na pinapahid ng dila
ang mga alaala.

Ngunit lulubog-lilitaw sa tubig-alat
ang kislap ng iyong mga matang
ayaw tumigil nang pagkutitap sa dilim,
ang mga labi mong posporong
umiigkas sa kilapsaw ng mga alon,
ang iyong mga daliring nanunurot
sa aking dibdib. Oo, kasalanan ko
ang umibig nang walang iniwan para sa sarili
maliban sa bakas ng iyong mga halik
sa aking pisngi, sa aking leeg, sa aking dibdib
maliban sa ilang hibla ng buhok na nalagas
at ihinatid ng hangin sa aking mga palad
maliban sa malalalim na gasgas sa aking gunitang
hindi kayang tangayin ng alon sa pampang
hindi kayang lunurin ng uliuli sa dagat
hindi kayang ilibing ng mga luhang kumakalat
sa pusod ng gabing di makatulog sa hapdi
ng inaasinang sugat sa puso sa bawat sandali.

Pantas ng Puso

2007-10-16T05:12:00.000+08:00

Sa aking nabigong anghel

Sadya sigurong hindi magkatiyap
ang ating mga palad
tulad ng pintong hindi mailapat
kahit gabuhok lang ang agwat
sa hamba.

Anong pag-ibig ang makapagbibigkis
sa magsintang may sarisariling daigdig?

Minahal kita sa abot ng kaya --
batid kong gayon ka rin --
ngunit nasa magkabilang dulo tayo
ng iisang makitid na tulay
namamaybay ako patungong timog
habang tinatahak mo ang hilaga.

Anong pag-ibig ang makapagbibigkis
sa magsintang may sarisariling daigdig?

Hindi sapat ang pulot-pukyutang
bumabalong sa ating mga labi
o ang dampi ng mga sampagita
sa mga katawang nagkikiskis
o maging ang pagliyad ng balakang
habang nakalutang sa langit
upang mabatid natin kapwa
ang pag-ibig.

Anong pag-ibig ang makapagbibigkis
sa magsintang may sarisariling daigdig?

Walang maitutugon
maging mga pantas ng puso
maliban sa palatak at iling.

Walang batas ang pag-ibig

2007-10-15T06:04:00.000+08:00

Walang batas ang pag-ibig --
liberte, equalite, fraternite
of the people, for the people, by the people
mula sa masa, tungo sa masa --
kundi ang batas
ng nahuhulog na tuyong dahon sa sanga
marahang idinuduyan ng hangin pababa
habang nagwiwisik ng ambon ang umaga
at banayad ang araw sa kulimlim na himpapawid
humahalik sa sariwang singaw ng lupa
o ang batas
ng bukadkad na rosas
na maluluoy din bukas
upang isuko sa grabidad
ang gandang busilak
o ang batas
ng ating mga luhang
kristal na gumuguhit sa pisngi
habang tahimik na magkahinang
ang mga labing ayaw nang magpaalaman
sapagkat bangin ang nasa likuran:
ang mga kahapon nating awayan --
at kumunoy naman ang nasa harapan:
bukas na hitik ng walang hanggang tampuhan.

Kaya dalisayin natin
ang sansaglit na ito
tulad ng magpakailanman,
idambana sa ating mga balat
itarak sa mga puso
ihagkis sa mga kaluluwang salat
sa inuumit na pagmamahal,
dalisayin ng mga luhang
magpapatigas sa naghinang
nating mga labi.

Ang ganitong paggising

2007-10-14T14:19:00.000+08:00

Nagising akong nakayakap ka sa akin
ngunit wala ka sa aking tabi
maliban sa halimuyak ng Estee
at bakas ng iyong mga daliri
sa aking dibdib sa nagdaang gabi.

Nakatulog akong wala ka sa aking piling,
pagdilat ng mata'y nariyan kang nakangiti
tulad ng mga araw at gabing
dumarating at naglalaho nang walang pasabi
ngunit nariyan lang sa mga singit-singit
ng panaginip at paggising
ang liwanag at dilim.

Kay hirap mahalin ng isang talang
lagi na lang titingalain ng hinagap:
narito pero wala, laging wala.

Ngayong Gabi

2007-10-09T08:49:00.000+08:00

Ngayong gabi
ihahabi kita ng pag-ibig
mula sa mga pigtal na petal
ng puting-puting champaca.

Kakatasin ko ang iba upang humalimuyak
tulad ng singaw ng iyong balat sa kasukdulan;
kukuyumin ko sa lukong ng mga palad
ang iba pang ibubudbod sa iyong paanan;
isasaboy sa hangin ang natira upang
unti-unting higupin din ng sariwang lupa.

Kasama mo ako sa huling paglalakbay.

Anekdota

2007-10-08T18:19:00.000+08:00

1. Payo ng isang kaibigan

"Mag-iingat ka sa kanila,"
payo ng isang kaibigan
inginunguso ang kabataang
pagdaka'y nilapitan niya
at hinagod-hagod
ng hinlalato ang gulugod
mula buntot hanggang batok
sabay kawit ng akbay
palayo.

2. Huwag makisukob

Sila na ngayon.
Pero pinag-iingat pa rin niya ako.

Oo, mag-iingat ako
sa bangis ng kamandag mo.

Kung hindi sapat

2007-10-06T21:59:00.000+08:00

We may love completely
without completely understanding love

-- A River Runs Through It

Ihinain ko sa hapag
lahat ng panaginip ko't pangarap
para sa iyo, para sa akin
para sa atin.

Ngumiti ka lang
tumayo at lumakad
papunta sa pintuan.

Tumakip ang aking magkabilang palad
sa pawisa't nanlalamig kong mukha,
sinisilip sa mga siwang ng daliri
ang nag-aatubili mong mga labi
ngunit hinawi lamang ng nakiraang hangin
ang mga ligaw na hibla ng iyong buhok
na nakikipaglampungan sa dapithapon:
ako na lang sana
ang hiwa ng liwanag
na humahaplos-haplos
sa iyong batok.

Ihinandog ko na ang lahat.
Patawad kung hindi ako sapat.

Bakal na Puso

2007-10-06T17:59:00.000+08:00

Mahapdi
ang paglabas-pasok
ng mga gunita
parang lagaring
unti-unting ngumangatngat
sa bakal na bilangguan
ng aking puso
sa gabing itong
sininop ko na lahat
ng iyong ngiti
at pinalaya sa hangin.

Sakong

2007-10-06T17:44:00.000+08:00

Sumasakit
ang aking puson
tuwing masisilip
ang rosas mong sakong

di ko alam kung bakit

naiisip kong nakatikwas
ang mga ito sa hangin
kuyom ng magkabila
kong palad habang
maalinsangan
ang gabi.

Sa isang lugar at panahong pareho tayong masaya

2007-10-06T15:24:00.000+08:00

Hihintayin kita.

Tulad ng pagyuko
ng mga talahib sa tag-araw
o pagsisid ng mga bulig
at hito sa ilalim ng putik
kapag tigang ang parang
at nagbibitak-bitak
ang mga pinitak.

Hihintayin kitang magising
mula sa mahabang pag-idlip
habang humihilikhilik ang hangin
sa iyong antuking paligid.

Baka sakaling
ihatid ka sa akin
ng tag-ulan.

Pagdalaw ng Lumbay

2007-10-05T06:00:00.000+08:00

Sa kanyang batid ang lahat

Walang pasapasabi
ang pagdalaw ng lumbay
sa maraming araw
na pinagsisisihan kong
natuto pang muling magmahal
ang pusong
ikinandado nang kaytagal
sa hininga ng mga anghel
na tumutunaw sa katinuan.

Sa gabing ito,
habang nakangiti ang buwan
at nahuhulog ang mga bituin
sa aking paanan –
ipagpatawad mo, mahal,
ililibing ko na
sa puntod ng mga alaala
ang iyong larawan.

Sana’y naisip mo rin kahit minsan
na ang pangungulila’y pintuan
ng lumbay: nakamamatay.
Nakamamatay.

Kahit alam kong wala ka

2007-10-02T19:00:00.000+08:00

Sinalok ko ang batis
sa magkabilang palad
at nakita ang iyong mukhang
hinihiwa-hiwa ng tubig
na nagsasayaw palagos
sa aking mga daliri.

Alam kong wala ka
sa aking likuran
ngunit lagi kang nariyan
sa lahat ng aking puntahan
gaano ko man pilitin
paulit-ulit na piliting
iwaksi ang larawan --

ng iyong mga labing
lagusan ng hiningang maligamgam
na mamasa-masang humahagod
sa pawisan kong balat

ng mga mata mong kumikislap
tumatagos sa aking pusong
nagdudumali sa pagtibok

ng iyong sutlang buhok
na humahaplos-haplos sa aking pisngi
sa pagitan ng siil na mga halik

A! hinahati-hati ng tubig
ang iyong mukha
sa aking mga palad
hanggang lunukin ng batis
ang mga alaala.

Ikinamamatay ko ang mga sandaling ito.
Bakit ikinamamatay ko ang pag-ibig mo?

Tatlong Oras sa Iisang Silid

2007-10-02T10:00:00.000+08:00

Simbilis ng sansaglit
ang tatlong oras sa iisang silid
para ikumpisal ang pag-ibig --
sa namumulang dulo ng mga daliri
ng iyong paa, malambot na talampakan,
makinis na binting amoy-pinipig,
sa siksik na mga hitang pumipintig
sa bawat usal ng aking mga labi
sa kasalanang itong laging inuulit.

Matris

2007-10-02T01:00:00.000+08:00

Sinaliksik kita
mula sa yutang mukhang
salasalabit sa internet,
sinungkit sa matris
ng teknolohiya
ang nakangiting mga mata
at nakahikbing mga labi.

Nagkadugtong
ang ating mga linya,
naghinang
ang ating mga buhay
sa isang kisapmata
inialay sa iyo ang kaluluwa.

Ngunit mapanlinlang
ang mga larawan.

Habang umiibig ako nang wagas
lalo namang pinaparusahan
ng iyong ngiti, ng iyong hikbi
ng iyong mga mata, ng iyong mga labing
pag-aari ng bayan.

Ibinilanggo kita sa aking bisig
upang habambuhay ibigin,
hindi upang sikilin.
Sinundan ko ang mga bakas mo
hindi upang mag-espiya sa mga kalaguyo
kundi upang alalayan ang bawat hakbang mong
kasimbuway ng kawayang
nakatukod sa kumunoy.
Sinabi ko lahat ng nasa aking isip
upang makilala mong lubos
ang aking pag-ibig
ngunit galit at muhi
ang ibinusal sa aking bibig.

Hindi na ako iimik.
Malaya kang humakbang palayo
walang lingon-likod sa lahat ng pangako.
Hindi na ako iibig.

Balita

2007-10-01T23:30:00.000+08:00

Nakatakip ang mga lumang
peryodiko sa balitang nakatihaya
sa kalsada, labas ang naninilaw
na talampakan, iniikutikutan ng ilang bangaw
habang walang pagitan ang pitik
ng mga kamera, kindat ng flash.

Sinubukan niyang umuwi kagabi
mag-isa, humahagok-humihikbi
sa bigat ng serbesa, gulapay
ang sariling pusong ipinalunod
sa alkohol ngunit nanatiling nakabaon
sa kanyang diwa, sa kanyang sikmura,
sa kanyang dibdib ang mga gunita
ng pamamaalam sa sintang
naglahong parang bula.

Narito ang balita
dinamitan ng mga lumang
peryodikong pambalot ng tinapa
sa gitna ng aligagang kalsada.

Wala Man sa Listahan ang Ating Pangalan

2007-10-01T23:00:00.000+08:00

Wala Man sa Listahan ang Ating Pangalan
Ariel N. Valerio

At magpapatuloy ang lahat
nakaangkas man tayo sa karwahe ng dalita
o nakasubsob sa dapog ng anunsyo
o kinukuba ng pagtutuos ng langutngot
ng bagong tabas na papel de bangko
o kalansing ng lata sa utak, bakal sa sikmura,
pulbura sa kamao; magpapatuloy nang walang pasabi,
walang atubili sa sandaling ihudyat ng mga bus at jip
ng humihimpil sa bangketang dinadagat
ng mga mukhang nilulunos at nalalanos sa pagdarahop
nakikiramay at nakikibaka sa bawat higithininga
ng pabrika, pagbaon ng mga sundang sa tigang
na pinitak, pagngangalitbagang ng mga paaralang
binukbok at nilumot ng siglusiglong pagkakait
sa tunay na kaalaman: tutuloy ang lahat
sa tulay ng Makopa, magsisindi ng kandila
o sulo o flaslayt o rosaryo o dibdib o diwa
upang silaban ang dinayaming ipot ng uring nakaraan.
Habang nakahalik sa lupa ang tainga ng bayan,
gigitaw sa bawat ulunan ang mga sampagita,
humahalimuyak sa insensong sumasanib sa pinipig
ng pag-aaklas. At magpapatuloy ang lahat
isangkot man natin o hindi sa listahan
ng mga duguang anino ang ating pangalan.

Isang Hardin ang Pag-ibig

2007-10-01T22:30:00.000+08:00

Isang hardin ang pag-ibig

Isang hardin
ang pag-ibig:

hinihintay munang
matigmak ang lupa
sa luha ng langit
bago ihasik
ang mga punla

hinihintay munang
umusbong ang punla
sa sikat ng araw
bago ilipat
sa pag-uugatan

hinihintay munang
maglunti ang dahon
sa halik ng hangin
bago sumungaw
ang mga bulaklak

hinihintay munang
ngumiti ang kalikasan
sa mapagpalang mga kamay
bago madama
ang tunay na pagmamahal.

Kung nais mo lamang
pigtalin ang mga tangkay,
huwag, pakiusap, huwag
bigkasin ang sagradong
salita.

15 Setyembre 2007

Lobelia Lover's Lullabies

2007-10-01T22:20:00.000+08:00

Lobelia Lover’s Lullabies

1. Last day of love

We loved without tomorrow,
without knowing night or day
no trace of rancor
no figment of doubt
until now:
I was awakened
by the soft shower of rain
from a crevice created
by a broken window glass.
Slowly,
a drop
of clayish
blood
crawled
shaped
like
a
tear.

June 2005
I left my lover

2. Leave no traces

Leave no traces
of love in my bed:
I hate cleaning up the mess
of used condoms and semen
splattered on the sheets,
of genetic marks and pubic hair
lingering on my pillow,
of worn out perfume and burnt gel
smashed on the headboard.

I need no reminders
of desires consummated
and dragged to the dustbin
of short-term memory
for my love resides
not in the sexual glands
but in the deepest lacunae
of my spirit.

Love is not for you
or me to make
but that which our soul
once unified gives.

June 2007
I met my soulmate

3. Walk like a man

Today, I walk
in the garden
sniffing scents
of flowers abloom
filling my lungs
with nature's love --
the wind embraces me
butterflies kiss me
the sun showers me
with warmth
as I walk like a man
but with a woman's
exquisite spirit.

July 2007
I fell in love again

4. A vampire’s verisimilitude

Drink
this pained droplets
from my weary wrist
so I may see no more
of betrayed buffoons.

Drink,
let me be the wine
that quenches eternal
your thirst for libidinal liquids
spurting from anonymous flesh.

Drink, my love.
You cannot kill me twice.

August 2007
I hurt my lover

5. Beware, my spirit

Beware, my spirit
love lingers like thorns
in secret crevices:
when you shout
"I'm done with you!"
the real loving begins
and the pain
never ends.

September 2007
I hurt myself

Babaylan

2007-10-01T07:04:00.000+08:00

Babaylan
Ariel N. Valerio

Nangangalirang
ang latay ng dugo sa aking kandungan,
pinapapak ng maharlikang bangis,
kinukukot na burukratang anis
akong tagasuyo ng lila, taga-unab ng bulak,
tagahabi ng sutlang ngiting gigitaw
sa mga labing pinanday ng ngitngit,
hinulma ng pasakit.

Inilimbag ako
ng fax, kompyuter at betamaks
sa tinta ng pahayagan, gitata ng pistang lansangan,
balisawsaw ng kasaysayan;
pinaghukom ako ng alinsangang umaalimbukay
sa gulyat ng tingga, liglig ng mga lilong salita.

Nang itimbuwang ng aking tinig
at hintuturong nagsusumbong sa langit
ang niknik ng mga V-50, tiktik ng mga Uzi
sa abenidang kubkob ng kotse at pagkain,
bendita at iskapula, banderitas at eskayola,
nagluwal ng yutang amarilyo
ang inaserong dibdib ng bayan ko.

Ngunit
asupre ang Disyembre
ng aking panaginip
sa bukanliwayway ng bangas na bahaghari.
Hagikgik ng tutubing bakal ang pumunit sa himpapawid.
Sansaglit, sumulpot sa tinigang na pinitak
ang halakhak ng metalikong bubuwit, umaalingawngaw
sa laginlin ng dayong parikparik.
Sumungaw ang araw pagbuglaw ng buwan,
sumuka ng gitlang usisa ang buong larangan
at marahas na binaklas ng kaingin
ang pilapil na hinalas ng pamantingin,
ang nananaghiling lamig
hanggang makahiya’t talahib ay magtalukbong ng katal
sa tatag ng aking hiwaga’t himala.

Dinurog ang aking anting-anting.
Bolang apoy,
mga bolang aboy ng RAM at Pentagon
mga bolang apoy ng kanibal sa Washington
mga bolang apoy ng mga sundalong gumon
sa opyo ng linlang at sulsol
ang lumilitis, ang lumalapnos
sa aking kaluluwa,
ngumangatngat, naninigid sa miniskula ng balat
hanggang malimutan ko, malimutan kong lahat
ang pinunlang Pebrero ng pagmamahal.

Ay, babaylan!
balbal mong dila’y tinutumis
sa sangkalan ng talinghaga’t balintuna
ng pingkiang nagkukuta sa mga lihim na lungga
ng tiwaling katiwala
habang tinatadtad ang mapa’t bandila
ng pabrika’t linang na kubabaw ng digma.

Uyayian
ang alpombrang minsang lumatag sa lansangan,
orasyunan
bawat bathalumang yugyog-balikat
humahapay sa kalansay ng panganay,
ikmuhan
ang sikmura ng kunot-noong sanggol
sa pasmadong duyan ng inang nagpapasuso
sa daliring duguan,
ipaglaga ng lagundi
ang amang tanging patubig ang tumangis
sa lalamunang ipinatistis hanggang mamanhid
huwag lamgn humulagpos ang bugtong na nakaina
sa pinid na pitak ng pakikibaka.
Hagupit ng buntot-pagi
ay di rin lalanggas sa tiwangwang na hapdi
sa bawat banta ng pamamaalam,
budburan man ng abo
ang nginingiking bulong ng hatinggabi.

Catalona
ng luhaang lupa,
tumataghoy na pasilyo ng gunita
ako minsan ma’y di naglubid ng taludtod
sa moro-moro ng makatang salawahan,
minsan man ako’y di humimod
ng pilak sa sinakulo ng paminggalan,
minsan ma’y di ako humagod ng lungkot
sa pasyon ng mga pangamba,
kailanma’y di ko ipinagkanulo
ang mga adang binagwisan ng liwanag
ng kubing at tubao, pasiking at tinalak
sa mabining haplos ng mga pangarap.
Ano pang dasal ang di ko nauusal?
Ano pang diyos ang di pinamalimusan?
Ano pang handog ang iaalay sa kidlat at kulog?
Gutom ang banyagang punlong kumakalabit
Sa gatilyo ng kapatid sa kapatid.

Bawat paris ng paang tumikwas at magsiping
sinisilo’y ngalangala ng lagim, nilulunok ang bituka ng dilim
sa pangilin ng multong maniningil
tnagi mang kasukob ay hikbi
ng ginagasang hangin.

Nasaksihan kong lahat
at kinimkim bawat pilat paglisan,
hinilamusan ng halik ang buntong-hininga
sa paglalayag ng dalisay na adhika:
ilibing ang armas, iburol ang dahas.
Makitid ang birtud
ng karisma, gayuma’t agua bendita.
Hindi ko kayang paslangin lahat ng salarin
hindi ko kayang usigin lahat ng salot at sakit
hindi ko kayang sugpuin ang angaw-angaw ninyong hibik
hindi ako manunubos na hulog ng langit
sapag kayo,
kayong kinuba ng pagod,
binansot ng takot, pinagluksa ng baril at kanyon,
kinalbo ng kunsumi sa paghuhunos ng panahon,
kayong nakatarak ang pandinig
sa bawat kislot ng kalikasan, lisaw ng kababayan,
pintig ng kalayaan
ang orakulong huhutok, puwersang magtutundos
ng payapang bukas.

Oremus obispum –
Muli, aandapt ang dilawang liwanag
sa gusgusing sutana ng dapithapon;
Oremus obispum –
Muli, didipa ang dalamhati
aa kalsadang dinasalan ng kandila;
Oremus obispum –
Muli, pawisang aspalto’y uliuilng babatingaw
sa ikaanim na misteryo ng rosaryong kabalan:
Salvanos, salvanos, salvanos.

Perlas
akong dinuduwit ng limbas,
buyangyang na kalamna’y nilalamas
ng armas nukleyar, dinadapurak ng dolyar,
nilalapunday ng transnasyunal
dahil naglilihi ang aking kamalayan
sa mandirigmang sanggol ng sambayanan.

Ako’y mandadawak, ako’y asawang, ako’y mangkukulam,
butas ang palad, naglalagablab
ang mga kukong tinulisan ng muhi at lumbay,
umaapoy ang gulugod na taliba ng gulod
pagpagaspas ng mga palaspas sa malalayang talampas.

Patawarin ako ng puting aninong kumakaluskos
sa mulirat kong bangungot.

Dinadarang ako
ng mga bungong tumitibok sa aking talampakan
dinadarang ako ng mga bangkay na dumadaong
sa baybay ng balintataw kong binubulag
ng insenso arsobispo, tawas kongreso, ostiya negosyo,
dinadarang ako
ng bawat bumbunang binubutas ng dahas,
dinadarang ako
ng nangangalirang na saplot
ng aking bunso.

Bangon, bundok!
Ibulos ang inunan ng dugo,
ang supot ng kumikinang na ginto
sa pusod ng lungsod.
Babaylan akong perlas ng silanganan,
babaylan akong nagluwal ng himagsikan.